วันเสาร์ที่ 11 สิงหาคม พ.ศ. 2555

ต้มกบใส่ใบหมากขามอ่อน



ต้มกบใส่ใบหมากขามอ่อน
เห็นฮูปนี่แล้วกะคึดฮอดบ้านยามไปใส่เบ็ดกบคับ อีพ่อเพิ่นถ่ายจากนามาให้เบิ่งเข่ากะลังเขียว ยามอยู่บ้านกะคือสิได่ไปหาใส่เบ็ดกบนำหมู่ยุพู้นและคับ เลาะแคมป่า กบหลายคัก หมู่เพิ่นว่าปีนี้อุดมสมบรูณ์คักคับ น้ำท่าหลาย บ่อึดอยาก คับปีนี่
เครื่องปรุงตามนี้ที่หาได่จากหลังเฮือน
1.กบ 5-6 โตนี่ละคับ
2.ใบหมากขามอ่อน
2.ตะไคร้ 3 หัว
3.หัวข่า 3 แว่น ใว้ดับคาวกบ
4.ต้นหอมสด 3-5 ต้น
5.ใบบักกรูด 3-4ใบ
6.บักพริกสด แล้วแต่ผุมัก น้อยหลายกะตามใจเลย
7.น้ำปลา,เกลือ ใว้ปรุงความแซบนัว
สำหรับเครื่องปรุงที่ใช้ในการเฮ็ดต้มกบ กะคือกับการ เฮ็ดต้มส้มทั่วไป ซึ่งกะได้แก่ ตะไคร้ ใบบักกรูด หรือใบบักหูดบ้านเฮานี่หละ หัวข่า(เอาข่าแก่ๆกะได้) กระเทียม หัวผักบั่ว ผักหอม ผักซี เหล่านี้ เป็นผักที่เฮ็ดให้หอม แล้วกะกลบความคาว ความกุย ของกบ เอ้อลืม บักพริกนำเด้อ สิได้ออกเผ็ดจักหน่อย แล้วกะอย่าลืม ใบบักขาม ใบบักขามส้มอ่อนๆ จักกำหนึ่ง
เครื่องปรุงรส(ตามข่างเทิ่ง) กะมี เกลือ กับน้ำปลา กะพอ แต่ผู้ลังคน ย่านบ่แซบ กะอาจสิใส่ รสดี หรือ คะนอร์ต้มยำ ลงไปนำอันนี่กะบ่ผิดกติกา เพราะว่ากติกา การเฮ็ดอาหารอีสาน บ่มีสูตรตายโต เฮ็ดจั่งได๋กะได้ ว่าแต่ แซบ อิ อิ
เอากบที่เฮาหามาได้ มาล้างน้ำให้สะอาด ให้ขี้ดิน ขี้หยังเหยี่ย ที่ติดอยู่ออกให้เหมิด แล้วกะเอามาเฮ็ดให้กบเสียชีวิตก่อน(บางคนกะบ่ต้องเ ฮ็ดให้มันสิ้นชีพก่อนกะมี เอาเทลงหม้อน้ำเดือดเลย แต่ขะน้อยว่า มันโหดโพด กะเลยต้องเฮ็ดให้มันสิ้นใจก่อนจั่งเทลงหม้อ) การฆ่ากบ กะบ่ยากบ่ทรมารหลาย ผู้ลังคนกะสงสัยว่า สิเอาไม้เคาะหัวกบให้มันตาย คือเคาะหัวแย้ หัวกะปอม มันคือสิเป็นตายากแท้ จักว่าหม่องได๋เป็นหัวกบ หม่องได๋ เป็นคอ จักว่าสิเคาะหม่องได๋ มันบ่ต้องยากปานนั้นดอก แค่เอาเกลือโฮยลงไปใส่โตกบ แล้วกะซาวให้เข้ากัน เท่านั้นกบกะสิ้นชีพแล้ว เพราะเกลือสิไปดูดเอาน้ำที่อยู่ผิวหนังของกบออก ทำให้กบเกิดสภาวะ Dehydrate พะนะ กบกะสิช๊อกตาย อย่างบ่ทรมารเท่าเทลงในน้ำเดือด (การประหารชีวิตแบบนี้ ใช้ได้กับสัตว์ครึ่งบกครึ่งน้ำทุกชนิด บ่ว่าสิเป็น อึ่ง กบ เขียดจิโม้ เจียดจินา เขียดน้อย เขียดขาคำ รวมไปฮอด เขียดตะปาด พุ่นหละ)
ค้างหม้อ โดยใส่น้ำประมาณครึ่งหม้อ อย่าฟ่าวใส่น้ำหลาย จั่งค่อยเถี่ยนน้ำทีหลัง ถ้าต้มไปแล้วน้ำมันบก หลังจากนั้น กะทุบหัวตะไคร้ หรือบางคนกะปุ้มใบตะไคร้ใส่พร้อม ทุบหัวข่า ใส่ลงไป เอาหัวผักบั่ว หัวผักเทียม มาหมกไฟจักหน่อยจั่งค่อยถิ่มลงหม้อ จี่บักพริกแห้งใส่จักสี่ห้า หน่วย แล้วกะใส่เกลือลงจักช้อนโต๊ะ อย่าพึ่งใส่หลาย จั่งค่อยเติมทีหลังถ้ามันจาง
ต้มหม้อให้เดือด โดยเชื้อเพลิงที่เอามาใช้ในการต้มกบ ที่ดีกะคือ ฟืน หรือถ่าน ถ้าต้มเตาแก้ส มันบ่ดี ไฟมันแฮงโพด กบบ่เปื่อยดี พอน้ำเดือด จน ฟดเละๆ แล้ว กะเอากบที่เฮาเตรียมไว้ เทลงไปในหม้อ ปิดฝา ต้มไว้ โดยระวังอย่าให้ไฟมอด หรือหม้อปูม ถ้าหม้อปูม กะเปิดฝาออกจักคาว (ถ้าเป็นการต้มอึ่ง บ่ว่าสิเป็น อึ่งลื่ง หรืออึ่งยาง ใช้เวลาประมาณสามสิบนาที กะเปื่อยแล้ว แต่ถ้าเป็นอึ่งเพ่า โตใหญ่ๆต้องใช้เวลาหลายขึ้นไปอีก แต่ทั้งนี้ทั้งนั่น เวลาบ่เป็นที่ตายโต เฮาต้องทาว ตักขึ้นมาเบิ่งเองว่า มันเปื่อยหรือยัง)
เมื่อกบใกล้สิเปื่อย เฮากะใส่ใบบักขามอ่อน ที่เตรียมไว้จักกำ แต่ถ้าย่านมันบ่ส้ม กะทุบหน่วยบักขามดิบลงใส่นำกะได่ แต่กะอย่าให้ส้มคักหลายเด้อหละ กินแล้วมันสิไข้หลี (ขี้ไหล) ใส่ใบบักหูด ลงไปต้มต่ออีกจักหน่อย หอม
ทาวกบขึ้นมาเบิ่ง ว่ามันเปื่อยดีแล้ว กะเริ่มซีม เบิ่ง ถ้ามันจางกะใส่น้ำปลาลงไป ถ้ามันเค็มกะเติมน้ำลงไปอีก ถ้ามันบ่นัวกะใส่รสดี หรือผงชูรส ลงไป ถ้าแซบแล้ว กะหั่นต้นหอม ต้นผักชีลงไป แล้วกะปงหม้อลง จากนั้นเฮากะสิได้ ต้มกบที่หอม แซบ ส้มป่อยหล่อย ถืกปาก ตักใส่ถ้วย กินได้ทันที
เฮาสิสังเกตได้ว่าการเฮ็ดต้มกบ ต้องใช้เวลานานพอสมควร ต้องใจเย็นๆอยากกินของแซบ ต้องใจเย็นๆอย่าใจร้อน เพราะว่าถ้าต้มกบบ่เปื่อย ปรุงรสให้แซบปานได้ กะกินบ่แซบ เพราะกบมันหยาบต้องใจเย็นๆ ยามซดกินกะต้องใจเย็นก่อนสิซดกะเป่าให้มันเย็นก่อนเด้อ เดี๋ยวมันสิลวกลิ้น

ไม่มีความคิดเห็น:

แสดงความคิดเห็น