วันจันทร์ที่ 4 มิถุนายน พ.ศ. 2555

แกงหวายใส่เครื่องในไก่ เมนูแซบที่อยากบอกต่อ









แกงหวายใส่เครื่องในไก่ เมนูแซบที่อยากบอกต่อ
เว้าพื้นแกงหวาย พี่น้องบ้าน(มหา)เฮา กะคือสิพากันคุ้นเคยกันดีอยู่ดอกเนาะจ้า
บ่ว่าสิเป็นแกงหวายใส่หน่อไม้ แกงใส่ไก่บ้าน แกงใส่ซี่โครงหมู

ขามป้อมกะแกงกินดู๋อยู่จ้าตะผัดขึ้นมาอยู่บ้านเฮา ไปนำตลาดบ้านนอกเฮาสิมีขายอยู่เรื่อยๆจ้า
ตะกี้เห็นแต่แม่ใหญ่เลามักคักจ้าแกงหวายนี่ ตอนเป็นเด็กน้อยกะบ่ค่อยมักนำเพิ่นดอกจ้ามันขม
แต่ว่าพอเฒ่าโอ๊ะ เวลาผ่านไป รู้สึกว่าสิกินผักกะเดาแซบ กินแกงหวายนัวแล้วกะกินบักลิ้นฟ้าได้แบบบ่มีปัญหา ฮ่าๆ

แกงหวายใส่เห็ด น้ำยานางข้นๆ ใส่ปลาแดกนัวๆ แซบจนว่าข้าวเบิดติบ อิอิ

แต่ว่าเมนูที่อยากนำเสนอมื้อนี้กะคือ "แกงหวายใส่เครื่องในไก่"

ขั้นตอนการเฮ็ดกะบ่ได้ยุ่งยากอิหยังดอกจ้า กะคือเฮาแกงหน่อไม้นั้นล่ะ
ได้หวายมากะมาปอกเปลือกที่มีหนามมันออก ขั้นตอนนี้อาจจิเจ็บปวดรวดร้าวมือแหน่จักหน่อย
แต่กะคุ้มค่าจ้า คันโชคดีไปพ้ออันเพิ่นแกะไว้แล้วกะดีไปจ้า แต่ว่ากะแกะกาบแก่ๆมันออกอีกรอบแหน่เด้อจ้า
ผู้แข่วบ่ดี กะจิหย่ำบ่ขาดซั่นดอกหวา เลือกเอาแต่ส่วนอ่อนๆ แช่น้ำไว้บ่ให้หวายดำจ้า

ในระหว่างนั้นกะไปหย่องน้ำยานางเตรียมไว้ ล้างเครื่องในไก่ให้สะอาดแล้วกะหั่นๆเป็นต่อนพอดีคำ

เอาเครื่องในไก่ใส่หม้อรวนกับ พริกแห้ง ตะไคร้ หัวหอมแดง เกลือ ที่ตำให้เข้ากัน
รวนจนว่าเครื่องในไก่เปลี่ยนสีแล้วกะมีกลิ่นหอม (ก่อนสิอ่อมหรือแกงอิหยังกะตามถ้าเฮ็ดสูตรนี้สิบ่มีกลิ่นคาว ยกเว้นปลา เฮ็ดสูตรนี้บ่ได้ มันจิมุ่น อิอิ)

จากนั้นเฮากะใส่น้ำยานางลงไป น้ำยานางเดือดใส่น้ำปลาแดก เหยาะชูรสจักหน่อย ใส่หวายกับลูกโดดลงไป

ช่วงที่ถ่าให้เครื่องในไก่สุกกับหวายนิ่ม เฮากะตำข้าวเบือให้แหลกเอาน้ำเปล่าคนบ่ให้ข้าวเบือเป็นก้อน ขามป้อมใช้น้ำยานางนิล่ะคนไปโลด
กะว่าในหม้อได้ที่แล้วกะเอาน้ำข้าวเบือเทลงไป ขั้นตอนนี้อย่าหนีไกลหม้อเด้อจ้า ให้เทียวคนดู๋ๆ เดี๋ยวข้าวเบือจิติดหม้อ อิอิ

ข้าวเบือสุกกะใส่ผักขากับผักอิตู่แล้วยกออกจากเตา พร้อมเสิร์ฟ
มาๆ พี่น้องพายติบข้าวลัดท่งมากินข้าวแลงซุมกันจ้า

ที่มาบ้านมหาดอทคอม

ไม่มีความคิดเห็น:

แสดงความคิดเห็น