วันจันทร์ที่ 5 มีนาคม พ.ศ. 2555

แกงไก่ใส่ล่อน








แกงไก่ใส่ล่อน

มื้อฅนภูไท สิเฮ็ดแกงไกใส่ล่อนให้กินเด้อครับ เป็นสูตรของเฒ่าแม่เพิ่นถ่ายทอดมาให้ผม ล่อนหรือเส้นล่อน หมายถึง วุ้นเส้นเด้อครับ คนสมัยก่อนเขาเอิ้นวุ้นเส้นว่าล่อนหรือเส้นล่อน น่าสิมาจากด้ายไนล่อน ผุเฒ่าผุแก่เพิ่นอาจสิเห็นว่าวุ้นเส้น มีเส้นคล้ายๆกันกับเส้นด้ายไนล่อน กะเลยพากันเอิ้น ปัจจุบันนี้คำว่าล่อนกะน่าสิบ่ค่อยมีผุได๋ใช้ปานได๋แล้วหละน้อ(อันนี้ฅนภูไทตั้งข้อสังเกตเอง) มาเบิ่งวิธีเฮ็ดกันเลยครับ
สับไก่ใส่หม้อชิ้นพอคำ

ใส่พริก ข่า ตะไคร้ หอมแดง กระเทียมโขกละเอียดลงไป ใส่น้ำปลาแดก ใบมะกรูดลงไป แล้วยกขึ้นตั้งไฟทำการคั่ว

ใส่กะทิลงไปทีละนิดคั่วให้กะทิแตกมันให้กะทิซึมเข้าไปในเนื้อไก่ แล้วค่อยใส่หางกระทิลงไป

พอน้ำเดือดใส่เส้นล่อนลงไป

พอเส้นสุกดีแล้วใส่ผักอีตู่ ต้นหอม ปรุงรสตามใจชอบยกหม้อลง

ตักใส่ถ้วยเสริฟกำลังฮ้อนๆกับข้าวเหนียว 8)8)8)

นี่หละครับสูตรของเฒ่าแม่ ลองเฮ็ดกินเบิ่งเด้อครับรับประกันความแซบ 8)::)::)

ปล.เมนูนี้ผุบ่าวผุสาวไปจีบกันใหม่ บ่กล้ากินปานได๋ เหอๆ กินแต่ต่อนไก่บ่กล้ากินเส้น

ไม่มีความคิดเห็น:

แสดงความคิดเห็น