วันพุธที่ 7 ธันวาคม พ.ศ. 2554

"แจ่วบอง"สูตรเด็กน้อยสีเกด











เนื่องจากว่ามีคนถามสูตรมาถึงการเฮ็ดแจ่วบองไว้กินเองเฮ็ดแนวได๋ ว่าซั่น อธิบายปากเปล่าๆเผิ่นบ่ส่วงใจ สาธิตและเดือนเพ็ญให้เบิ่งแหน่ พานะ เลยจัดให้ตามคำขอหลังจากที่ไปเลาะตลาดหาวัตถุดิบตามต้องการหรือตามสูตรนู๋น้อยเอง ละจร้า อิอิที่จริงวิธีเฮ็ดแจ่วบองนู๋น้อยได้มาจากอา ยุบ้านเผิ่นสอนให้ตะสมัยเป็นสาวส่ำน้อยขึ้นใหม่ อิอิจากนั้นกะลองผิดลองถืกใส่นั้นใส่นี้ตามความแซบเจ้าของ จากเฮ็ดกินเองจนกระทั่งเฮ็ดเป็นของฝาก และมีคนติดใจ อิอิวัตถุดิบและส่วนประกอบหลักๆ- ปลาเมื่อย(ปลาร้า)- เกลือ- พริกป่น- ข่า- ตะไคร้- ใบมะกรูด- กระเทียม- หอมหัวแดง(หัวเล็ก)- มะขามเปียก- ผงชูรส น้ำปลาและปลาป่นหรือปลาย่าง หรือ ปลาทอด อย่างไดก็ได้ตามสะดวก จ้าส่วนผสมต่างๆนู๋น้อยบ่มีการตวงเด้อจ้า แบบว่าใช้วิธีการคาดคะเนส่วนผสมตามความรู้สึกว่าจะแซบ คั้นใช้วิธีตวงตามหลักสูตรย้านเป็นแนวอื่นยุ๊จ้า ฮ๋าๆๆ
ปลาเมื่อย(ปลาร้า)นอนในไห ได้มาจากทางร้อยเอ็ดแม่ดองเผิ่นเอามายามพี่น้องทางสีเกด

แม่ใหย่สอนเลากะเลยห่อให้ลูกสาวเอาลงมากินยุชลบุรี
ล้างสิ่งที่บ่พึงประสงค์ของคุณปลาเมื่อยออกก่อน พักไว้สะเด็ดน้ำแล้วก็สับให้ละเอียด จ้า จะได้บ่คาแข่ว อิอิ

บางคนเผิ่นกะใส่แบบเป็นต่อนบ่ต้องสับ กะได้คือกันจ้า แต่นางบ่มักแบบต่อน อิอิค้านฉีก

บางเทื่อกะต้มเอาแต่น้ำปลาเมื่อยกะได้จ้า คั้นบ่มักทั้งแบบต่อนและแบบสับ

จากนั้นก็ปอกเปลือกหอมหัวแดง กระเทียม สอยตะไคร้ ข่าอ่อน แล้วก็คั่วพอให้สุกมีกลิ่นหอมนิดๆ

ถ้ามีเตาถ่านก็ย่างเอากะได้จ้า คั่วสุกแล้วพักไว้ก่อน

หันมาฉีกปลาทอดเลือกปลาจิ๊กโก๋เพราะว่าคะเจ้าทอดขาย อิอิ บ่ต้องมาเสียเวลาทอดเอง

แต่ถ้าใช้เตาถ่าน ทุกอย่างจะย่างไฟถ่านจ้าจะหอมและแซบกั่วกันหลาย

เลือกที่จะป่นปลาจิ๊กโก๋ก่อน แล้วก็ ข่า กะเทียม หอมแดง ตามลงไปตามลำดับ พอแหลกละเอียดดีแล้ว

ก็ ใส่พระเอกลงไป(ปลาเมื่อยสับ) ตามด้วยตะไคร้สอย และใบมะกรูดหั่นฝอย

ใส่เกลือ ผงนัว(ผงชูรส)อิอิ แล้วก็ออกแรงกันอีกรอบ จนคาดว่าเครื่องปรุงทุกอย่างเข้ากัน

แล้วก็ใส่น้ำมะขามเปียกเป็นลำดับสุดท้าย แล้วก็คลุกเคล้าให้เข้ากันอีกรอบ จ้า

จากนั้นก็ตั้งกะทะด้วยไฟอ่อนๆใส่น้ำมันนิดหนึ่ง น้ำมันอะไรก็ได้เด้อจ้า แต่นี่งวกซ้ายงวกขวาหาน้ำมันถั่วเหลืองบ่พ้อ

เห็นตะขวดเปล่าจะออกไปซื้อปากซอยกะไกล ซอกตู้เย็นเห็นมีน้ำมันมะกอก อิอิ น่าจะใช้ได้ ลองดู..

แล้วก็เอาแจ่วที่ได้ลงผัดกับน้ำมันถ้าแจ่วแห้งไปก็เติมน้ำล้างจากครกที่ตำแจ่วนั้นละจ้า อิอิ บ่เสียหาย

ผัดไปสักครู่จะมีกลิ่นฉุน เริ่มจามกันทั่วบ้านก็ซิมเบิ่งว่า รสชาตได้ตามต้องการหรือไม่สุดท้ายเติมน้ำปลาทีหลังสุด ผัดต่ออีกจามหนึ่ง(เพราะเริ่มแสบจมูกแล้ว) พอแล้ว จ้า

รสชาตที่นู๋น้อยปรุง ก็คือ เค็มนำ เผ็ดตาม เปรี้ยวและหวานนิดหน่อยจากน้ำมะขาวเปียก
ผัดเสร็จแล้วพักไว้ให้เย็น แล้วก็ บรรจุใส่กล่องหรือขวดโหลใส่ตู่เย็นไว้กินนานๆจ้า
บางคนว่าประหยัดไปหลายมื้อหรือเดือนหนึ่งเลยกะได้ ฮ่าๆๆ

สำหรับคนที่กินจางบ่ได้ กะเติมน้ำปลาก่อนรับทานกะได้จ้า

เฮ็ดแล้วกะทดสอบฝีมือเจ้าของก่อน บีบบักนาวกับเย๊าะน้ำปลาเพื่อความกลมกล่อมยิ่งขึ้น

แต่งหน้าเพื่อความไฮโซยิ่งขึ้นด้วยผักชี อิอิ
มีผักลวกเป็นเครื่องเคียงและแกงปลาหรดใส่สารพัดผักเพื่อจะได้คล่องคอ ยิ่งขึ้น
จะกินกับข้าวสวยร้อนๆหรือข้าวเหนียวนึ่งสุกใหม่ๆก็อร่อย อิอิ
สุดท้ายนี้ หวังว่าคนที่ต้องการสูตรแจ่วบองนี้จะมาพ้อและทำตามได้อย่างอร่อย

บ่หวงสูตรดัดแปลงได้ตามอำเภอใจเด้อจ้า แต่ละหม่องแต่ละถิ่นบ้านเกิดความเป็นอยู่

การทำมาหากินบ่คือกัน ข้าวนาปลาซุมบ่ท่อกัน แต่กะหวังว่าจะได้เห็นอีกหลายๆสูตร

ตามก้นกันมาบอกต่อๆกันแบ่งปันกันแซบ อิอิ จะลักสูตรเผิ่นซั่นเด้ทางหนิ ฮ่าๆๆ

ไม่มีความคิดเห็น:

แสดงความคิดเห็น