วันอาทิตย์ที่ 8 พฤษภาคม พ.ศ. 2554

แกงเห็ดเผาะหนังใส่ยอดส้มโมง








เบิ่งตอนแลงก่อนมาเฮ็ดงาน พี่น้องไทอุดรที่เผิ่นกลับมาแต่ยามบ้าน เผิ่นได้เห็ดเผาะหนังมาต้อนครับกับใบย่านาง คึดอยากอยู่พอดี เสียอย่างเดียว เผิ่นบ่เอายอดผักติ้วมาฝากนำ เลยต้องหาแนวส้มอย่างอื่นใส่เห็ด
คึดได้หว่ามีต้นส้มโมง ถืกสินหง่าแต่โดนแล้วอยู่ข้างฮั้ว ปานนี้คือสิป่งยอดแล้วหละ (ถือกล้องหย่างไปถ่ายเบิ่งก่อนกะน้า)กะลังงามพี่น้อง ยอดอั้วซั้วยุ
ล้างเห็ดเผาะให้สะอาดครับ ถ่าล้างบ่สะอาดมันสิแหง๋ดินกินบ่แซบเด้ คั้นน้ำยานางครับ ใส่หม้อตั้งไฟ ทุบตะไคร้กับพริกสดใส่ ใส่เกลือนำจักหน่อย
พอน้ำเดือดจั่งใส่เห็ดลงไปครับ ตามด้วยใบส้มโมง พอเห็ดเผาะสุกกะปรุงโลดครับ ด้วยน้ำปลาแดก กับผงนัว พอนัวดีแล้ว ก่อนสิปงหม้อกะเด็ดยอดผักอิตู่ถิ่มใส่ เสร็จแล้วกะปงหม้อเลยครับแกงเห็ดเผาะเสร็จแล้วกะเหลือแจ่วครับ กินข้าวกับแกงเห็ดบ่มีแจ่วจ้ำมันบ่แล้ว คั่วบักพริก หัวบั่ว หัวกระเทียม หละกะบักเขียเคียให้สุกครับ เสร็จแล้วเอาลงครกตำ อย่าสุให้แหลกปานได๋ ปรุงรสด้วยปลาแดก(เอาต่อนใส่นำเด้อ ผงนัว แล้วกะบักนาวครับเสร็จแล้วเด้พี่น้อง มาๆ กินข้าวแลงนำกันครับ

ไม่มีความคิดเห็น:

แสดงความคิดเห็น